Galego era a lingua na que trobaban os reis e o pobo. As composicións recolléronse en Cancioneiros e Pergamiños que empregaban os xograres para a súa interpretación. Do máis famoso deles, que se atopa na J. Pierpont Morgan Library de Nova York, dannos conta Enrique, Xián, Fátima e Miguel.
Deixarémosvos nos próximos días algúns falangullos elaborados polo alumnado de 3º ESO na materia de Lingua e Literatura Galega, nos que os seus autores e autoras investigaron sobre o Medievo en Compostela.
Coñecer a importancia da nosa cultura e da nosa historia para tecer identidade e poder valorar o alleo dende o orgullo do propio. Este é o principal obxectivo deste traballo elaborado no marco do proxecto educativo SEMGAL.
No 2022, ano no que se celebra o centenario do nacemento de María Casares, o alumnado de francés de 3º ESO do IES Xelmírez I, traballou sobre a figura desta galega universal, unha das maiores actrices que tivo Francia.
Fixo pesquisas na biblioteca e foise achegando ao legado desta inmensa artista, nacida e criada en Galicia, filla de Santiago Casares Quiroga, Xefe de goberno na II República Española e de Gloria Pérez, exiliados a Paris no ano 1936 por mor do golpe de Estado fascista.
No marco do proxecto Tecendo Identidade(s), vén de nacer o 7º club de lectura deste curso! Promovido e coordinado polo Equipo de Igualdade, está concibido como un espazo de recoñecemento no que o noso alumnado se sinta acompañado e conte coa compliciade dos iguais e dos adultos na construción da súa identidade.
Onte acompañounos Nee Barros, durante tres horas! Falamos da vida, da necesidade de ser quen queiramos ser, e tamén do seu libro Identidade que escribiu cando cursaba 3º de ESO.
Unha tarde inesquecible, que agardamos vaia fornecendo dos vimbios necesarios para a construción dun mundo máis libre e máis respectuoso coa diversidade.
Conmemorar a barbarie, amosala para evitar que se volva repetir, velaquí o principal obxectivo da exposición que hoxe inauguramos na Biblioteca do IES Xelmírez I.
Realizada polo profesorado de alemán (Sagrario Torrado- Laureano Araújo), Historia (Lucas Espasandín- Alba Serén) e Filosofía (Uxía Martínez Suárez), no marco do proxecto Tecendo Identidade(s), dá a coñecer o que lles aconteceu aos xudeos alemáns na década dos anos 30.
A mostra, aberta a toda a Comunidade Educativa, organízase arredor de catro temas:
Os xudeos de Alemaña na República de Weimar
A política antixudía na alemaña nazi (1933-1938)
A reacción xudía ás políticas antixudías nazis
A “Kristallnacht”, do 8 ao 9 de novembro de 1938
Ademais, unha parte da exposición pon en relación as xuderías galegas e as do conxunto da Península Ibérica co destino sufrido polos xudeos do Holocausto. Estes, expulsados en 1492, fuxiron a Grecia, Turquía e Europa do leste, levando canda si a nosa cultura, e volvendo sufrir alí a persecución nazi.
A exposición agocha moita información relevante baixo os códigos QR de cada un dos paneis. Curiosas son as historias das xudarías galegas e curiosa e cruel a historia dos sambenitos de Tui: 5 lenzos, con 14 penitenciarios; as teas, adornadas coa cruz de Santo André, teñen na parte inferior o nome da persoa, o ano do proceso e a acusación de xudeo.